19 Oct 2017 | बिहीबार, २ कार्तिक, २०७४

logo
CEDEP
शनिबार, २६ चैत, २०७३

‘आइईसी ग्रुपलाई शैक्षिक हबका रुपमा विकास गर्ने सपना छ’

‘आइईसी ग्रुपलाई शैक्षिक हबका रुपमा विकास गर्ने सपना छ’

आइईसी कलेज अफ फेसन एण्ड आर्टसकी म्यानेजिङ डाइरेक्टर हुन्—शैलाजा अधिकारी । सन् १९९७ मा नेपालमै पहिलो पटक फेशन कलेजका रुपमा स्थापित आइईसीलाई नेपालको प्रतिष्ठित फेसन कलेजका रुपमा लिइन्छ । अहिले डिप्लोमा र ब्याचलरसमा फेशन र इन्टेरियर डिजाइनिङको अध्यापन गराइरहेको आइईसी कलेज मलेसियाको प्रतिष्ठित लिम कोक विङ युनिभर्सिटीको सम्बन्धनमा सञ्चालित छ । 

अधिकारीको आइईसीबाहेक विद्यालय शिक्षामा पनि लगानी छ । आइईसी ग्रुपलाई एक एजुकेशन हबका रुपमा विकास गर्ने सपना बुनेकी उनी चाडै एमबीए, होटल म्यानेजमेण्ट कलेज सञ्चालनका लागि पनि तयारी गरिरहेकी छिन् । महिला ब्यवसायीका रुपमा छुट्टै पहिचान बनाएकी अधिकारीसँग एजुकेशन समाचारले गरेको विशेष कुराकानीः

आइईसीले कहिलेदेखि पठनपाठन सुरु गरेको हो ?
हामीले पहिलो पटक नेपालमा फेसन पढाउने कलेजका रुपमा सन् १९९७ मा आइईसी सुरु गरेका हौं । अहिले हामीले नेपालमा फेसन पढाउन थालेको १९ वर्ष पूरा भएको छ ।

यो १९ वर्षको अवधिलाई कसरी सम्झनुहुन्छ ?
१९ वर्षको अवधिमा कतिपय क्षणहरु यस्ता पनि आएका थिए कि मैले अब बन्द गर्नुपर्छ होला । किनभने त्यो बेला खाली घाटामात्र भइरहेको थियो । भाडा र स्टाफको स्यालरी तिर्दैमा हैरान भइसकेकी थिए । अब नगरौं धेरै भन्ने मनमा कति पटक आउथ्यो । तर, नेपालका लागि यो नयाँ करिअर प्रस्पेक्टीभ थियो, यसका बारेमा धेरैलाई थाहा थिएन् । जब मानिसहरुले फेसन डिजाइनिङका विषयमा बुझ्छन् त्यसपछि लुकिङ ब्याक हुन्छ भन्ने मैले सोचेर अगाडि बढिरहे । र, मैले यही सम्भावना र इच्छाशक्तिका बलमा आइईसीलाई टिकाउन सके ।

मैले त्यो समयलाई आर्जनको समयभन्दा पनि लगानीको समयका रुपमा हेरे । अहिले नेपाली फेसन इन्डष्ट्रीज त छदैंछ धेरै बाहिरी देशहरुमा पनि आइईसीको विद्यार्थीहरु देख्छु, मलाई निकै आनन्दको महसुस हुन्छ ।

कति विद्यार्थी लिएर आइईसी सुरु गर्नुभएको थियो ?
मैले सुरुमा १३ जना विद्यार्थी लिएर यो कलेजको सुरुवात गरेकी थिए । तर, त्यो नम्बर मेरा लागि निकै लक्की सावित भयो । १३ जनाबाट सुरु गरेको कलेज अहिले बागबजारमा मात्रै ३ सय ५० जनाभन्दा बढी विद्यार्थीहरु फेशन डिजाइनिङ पढ्छन् । ९० जनाजति इन्टेरियर डिजाइनिङ पढ्छन् । अहिले हेर्दाखेरि मलाई निकै खुशी लाग्छ । किनभने नेपालमा मैले दुई वटा करिअर प्रस्पेक्टीभ लिएर आए—एक फेसन डिजाइनिङ र अर्को इन्टेरियर डिजाइनिङ । दुवै करिअर ओरेन्टेड विषय भएकाले यी विषय पढ्ने विद्यार्थीहरु सजिलै जागिर र आफ्नै ब्यवसाय सुरु गर्न सक्छन् । अहिले हाम्रा उत्पादनहरुले ठूला—ठूला बुटिक, एक्पर्ट हाउस चलाउँछन् । हाम्रो कलेजका कतिपय उत्पादनहरुको त ४÷५ सय स्टाफ पनि छन् । यो सबै देख्दा त्यो बेला मैले ठीक गरेछु भन्ने अनुभूति हुन्छ ।

अहिलेको अवस्था कस्तो छ ?
त्यतिबेलाको इन्भेष्टमेण्टले अहिले मलाई राम्रो प्रतिफल दिइरहेको छ । केही समय पहिले मात्रै चीनमा आइईसी कलेजले एसियाको टप फेसन इन्स्च्युसनको पुरस्कार पायो । नेपालजस्तो देशबाट त्यहाँ प्रतिस्पर्धा गरेका थियौं, हाम्रो प्रतिस्पर्धीका रुपमा मलेसिया, कोरिया र भियतनामसहित ५ देशका प्रतिष्ठित कलेजहरु थिए । मैले त्यहाँ त्यो अवार्ड पाउँछु भनेर सोचेकी पनि थिइन् । तर, आइईसी कलेजको कन्ट्रीब्युसन र सबै अवस्थाको बारेमा हेरिसकेपछि हामीलाई एसियाको टप फेशन अर्गनाइजेशनको अवार्ड दिइयो । त्यो हाम्रा लागि निकै ठूलो गौरवको विषय थियो । यो एवार्ड विद्यार्थीहरुको क्रेटिबिलिटी, इन्टरनेशनल मार्केटमा उनीहरुको एक्स्पोजर र योगदानका आधारमा एवार्ड दिइएको हो । अहिले नेपालमा फेसनको मार्केट जसरी बुमिङ भइरहेको देख्दा मलाई खुशी लाग्छ ।

हामीले सन् २००४ मा नेपाल ‘फेसन वीक’को पनि सुरुवात ग¥यौं । अहिले ‘टीजीआइएफ फेसन वीक’का रुपमा हिमालयन टाइम्ससँगको सहकार्यमा यो कार्यक्रम गरिरहेका छौं । अहिले म के फिल गर्छु भने हामीले गरेका यी सबै प्रयासहरु सकारात्मक थिए ।


अब के सम्भावना देख्नु हुन्छ ?

अब त मानिसलाई फेसन डिजाइनिङका विषयमा सिकाउनै पर्दैन् । म सम्झन्छु, जतिबेला हामीले पढाउन सुरु गरेका थियौं, मानिसहरुलाई बुझाउँदा पनि यो विषयमा बुझ्न सकिरहेका थिएनन् । विद्यार्थीका अभिभावकहरु बुझ्न आउँदा यो के साँच्चै काम लाग्छ र म्याम ? भनेर सोध्नुहुन्थ्यो । मेरो पहिलो ब्याचका विद्यार्थीहरु जस्तो तरुणिका महतो, हर्षिया बानुलगायतका विद्यार्थीहरु र दोस्रो ब्याचका विद्यार्थीहरु धेरै राम्रो गरिरहेका छन् ।

अहिले हामी कहाँ फेसन डिजाइनिङ र इन्टेरियर डिजाइनिङबारे बुझ्न आउने विद्यार्थीहरु हामीभन्दा बढी बुझेका हुन्छन् । उनीहरु अहिले नै भन्छन् हामीले यहाँ पास गरेपछि बाहिर कहाँ काम गर्ने, कहाँबाट माष्टर्स गर्ने उनीहरु सबै विषयमा तयार देखिन्छन् ।


एउटा फेसन डिजाइनर वा इन्टेरियर डिजाइनर बन्न कति समयको कोर्स गर्नुपर्छ ?

ब्याचलरको कोर्स तीन वर्षको हुन्छ । यसका लागि प्लस टु पास गरेको हुनुपर्छ । तीन वर्षमा फुलटाइम ६ देखि ८ घण्टासम्म पढ्नुपर्छ । तीन वर्षमा पनि क्रेडिट आवर धेरै हुन्छ । धेरै क्रेडिट आवर भएकाले हामीले कहिलेकाही शनिबार पनि क्लास लिनुपर्छ र छुट्टीहरुमा पनि क्लास लिनुपर्छ । बीबीए कोर्सहरुभन्दा पनि बढी आवर पढाउनुपर्छ । डिप्लोमाको कोर्स गर्ने हो भने त्यो १५ महिने कोर्स हुन्छ । यो कोर्स गर्नका लागि एसएलसी पास भएको हुनुपर्छ । जसमा २ देखि ४ घण्टा क्लास हुन्छ ।


शुल्कका हिसाबले कस्तो पर्छ ?

विश्वब्यापी रुपमा नै हेर्ने हो भने फेसन डिजाइनिङ र इन्टेरियर डिजाइनिङ महंगो कोर्स हो । ब्याचलरमा बीबीएभन्दा पनि महंगो छ । ब्याचलर गर्नका लागि झण्डै ६ लाख रुपैयाँ खर्च हुन्छ । डिप्लोमा गर्नका लागि ८५ हजारदेखि ९० हजार रुपैयाँ लाग्छ । यो डिप्लोमा १५ महिने प्रोफेसनल कोर्स हो । यो इन्टरमिडियट नभएर इन्डीपेन्डेन्ट कोर्स हो ।


फेशन डिजाइनिङ र इन्टेरियर डिजाइनिङको क्षेत्र ब्यापक बन्दैछ । विद्यार्थीहरु ब्याचलर्स गरेपछि कति पैसा कमाउन सक्छन् ?

ब्याचलर गरिसकेपछि तपाईंको स्टाटिङ स्यालरी नै २० देखि २५ हजारसम्म हुन्छ । तर, धेरैजसो ब्याचलर पढ्ने विद्यार्थीहरुको टार्गेट विदेश हुन्छ । नेपालमै पनि हामीले तीन महिने इन्टरनसीप राखेका हुन्छौं, त्यस लगतै उनीहरु २० देखि २५ हजार तलब सजिलै पाउँछन् ।


डिप्लोमा गर्नेहरुको तलब कतिसम्म हुन्छ ?

फेशन डिजाइनिङजस्तो विषयमा डिप्लोमा पनि धेरै पैसा कमाउन सकिन्छ । त्यसमा तपाईको क्यालिभर र क्रियटिभिटीमा भर पर्ने हो । डिप्लोमा गर्नेहरुको पनि सुरुवाती तलब १७÷१८ हजारदेखि माथि नै हुन्छ ।


विदेशमा कुन—कुन देशमा नेपाली फेशन डिजाइनरहरुलाई अवसर छ ?

अहिले धेरैजसो हाम्रा विद्यार्थीहरु अमेरिकामा छन् । यसबाहेक बेलायत, अष्टे«लियामा पनि हाम्रा धेरै विद्यार्थीहरु छन् । अहिले आएर हाम्रा धेरैजना विद्यार्थीहरु फ्रान्स गइरहेका छन् । उनीहरुले त्यहाँका बुटिकहरुमा जागिर पनि गरिरहेका छन् । यस वर्षमात्र मेरा तीन जना विद्यार्थीहरु पेरिस पुगेका छन् । यसबाहेक पछिल्लो समय युरोपियन देशहरुमा धेरै विद्यार्थी गइरहेका छन् ।


एउटा राम्रो फेशन डिजाइनर हुनका लागि के क्षमता हुनुपर्छ ?

तपाई आफूले देखेको भन्दा बाहिर सोच्न सक्ने क्षमता हुनुपर्छ । माइण्ड सबैको क्रियटिभ हुन्छ, तर हामीले त्यसको उपयोग गरेका हुँदैनौं । खादा, बस्दा, उठ्दा पनि क्रियटिभ थिकिङ गर्नेहरुले यो पेशा छान्दा सबैभन्दा राम्रो हुन्छ । डिजाइनरले हरेक समय सोचेर बस्नुपर्छ । हरेक ठाउँमा पार्टी जाँदा होस् वा फिल्म हल वा बाटोमा हिडिरहेका बेला नै किन नहोस सिक्न र नयाँ सोच्नका लागि दिमागलाई क्रियाशील बनाइरहनुपर्छ । अर्को महत्वपूर्ण कुरा सधैं प्यासन हुन जरुरी हुन्छ । यो त्यस्तो पेशा हो जहाँ निरन्तरता र लगनशीलता पनि उतिकै जरुरी हुन्छ । १८ घण्टा काम गर्ने प्यासन भएकाहरुले रोज्नुपर्छ । यो फिल्डमा नेम, फेम र मनी सबै कुरा छ । यी सबैका लागि त्यतिकै हार्ड वर्क पनि चाहिन्छ । हार्ड वर्क गर्नेहरुले पछाडि फर्केर हेर्नु पर्दैन् ।


भविष्यको सपना के छ ?

अबको मेरो सपना एउटा होटल म्यानेजमेण्ट र एमबीए कलेज खोल्ने छ । म त्यसका लागि निरन्तर कोशिश गरिरहेकी छु । एजुकेशन सेक्टरमा मेरो प्रिस्कुल, स्कुलदेखि प्लस टु कलेज आउदैंछ । ब्याचलरमा अहिले फेसनमात्रै छ अब अरु फ्याकल्टीमा पनि हात हाल्ने योजना छ । एजुकेशनका लागि आइईसी ग्रुपलाई एक हबका रुपमा विकास गर्ने मेरो सपना छ । र पछि देशको सेवा गर्ने पनि मेरो ठूलो इच्छा छ । राजनीतिमा आएर देशलाई केही गरौ भन्ने पनि मेरो भविष्यको योजना छ । पैसा मात्र पनि कति कमाउने, समाजलाई पनि त केही दिनुप¥यो ।

Loading...

  

 

 

धेरै पढिएका समाचार